Mini-TES gaz porshenli qurilmasi modulli binosini shovqindan izolyatsiya qilishning ikki usulini qiyosiy texnik-iqtisodiy tahlili

Dolzarbligi: mini-TES modulli binosida joylashtirilgan, elektr quvvati 2300 kVt boʻlgan MWM TCG 3020 V20 gaz porshenli qurilmasi (GPQ) kuchli shovqin manbai hisoblanadi: ishlayotgan dvigatel korpusi yonida tovush bosimi darajasi 100–105 dBA ga yetadi. Bunday qurilmalar koʻpincha turar-joy va jamoat binolariga yaqin joylashtirilgani sababli, shovqin boʻyicha sanitariya meʼyorlariga rioya qilish ekspluatatsiyaning majburiy shartidir. Ishda modulli binoni shovqindan izolyatsiya qilishning amalda joriy etilgan ikki usuli qiyoslanadi.

Maqsad: binoni toʻliq akustik panellar bilan qoplash (Chilonzor obyekti) hamda bino oddiy panellar bilan qoplangan holda agregat atrofiga lokal akustik gʻilof oʻrnatish (Sergeli obyekti) usullarini texnik-iqtisodiy va texnik jihatdan qiyoslash, talab etilgan akustik samaradorlikni kamroq kapital xarajatlar bilan taʼminlaydigan yechimni aniqlash.

Usullari: bir xil bino oʻlchamlari (25,5×20,0 m) va panel qalinligi (150 mm) sharoitida ikkala variant qiymati hisoblandi; komponovkaning uch oʻlchovli modeli qurildi; ikki amaldagi obyekt fotomateriallari tahlil qilindi va akustik samaradorlik qiyosiy baholandi.

Natijalar: akustik himoyani shovqin manbai yonida jamlash akustik panel maydonini 703,45 m² dan 109,73 m² gacha qisqartirish hisobiga shovqin izolyatsiyasiga ketadigan kapital xarajatlarni 40,9 % ga (taxminan 155 298 050 soʻm yoki 12 325 AQSh dollari) kamaytirishi koʻrsatildi; bunda baholash maʼlumotlariga koʻra akustik samaradorlik taqqoslanadigan darajada saqlanadi.