Suv purkashning kondensatordagi vakuum va gidravlik qarshilikka ta’siri

Dolzarbligi: sanoat kondensatorlarida vakuumni yaxshilash uchun qoʻllaniladigan qoʻshimcha suv purkash tizimlari odatda kondensatorning kirish qismiga oʻrnatiladi. Purkalgan suv tomchilari bugʻ oqimi bilan kirish zonasidayoq oʻzaro ta’sirlasha boshlaydi va mahalliy gidravlik qarshilik hosil qiladi. Ushbu mahalliy qarshilikning miqdori va uning umumiy vakuumga ta’sirini aniqlash muhim ilmiy-amaliy vazifadir.

Maqsad: kondensatorning kirish qismiga oʻrnatilgan forsunkalardan purkalgan suv tomchilari hisobiga yuzaga keladigan mahalliy gidravlik qarshilikni aniq hisoblash va uning kondensator vakuumiga ta’sirini baholash.

Usullar: tadqiqotda 168 ta quvurli gorizontal kondensator (bugʻ kirish yuzasi 0.24 m², quvurlar oraligʻidagi kesim yuzasi 0.13 m²) uchun kirish qismidagi ikki fazali oqim tahlil qilindi. Bugʻ sarfi 806 kg/soat = 0.224 kg/s, bosim 4 kPa, zichlik 0.028 kg/m³, kirish tezligi 33.3 m/s. Qoʻshimcha suv sarfi 279 kg/soat (0.0775 kg/s), forsunka bosimi 0.2 MPa (2.0 bar), tomchi tezligi 14.0 m/s, tomchi diametri 1.0 mm. Tomchi konsentratsiyasi, aerodinamik qarshilik kuchi, turbulent aralashish qarshiligi hisoblandi. Parametrlarning oʻzgarishiga bogʻliq holda (suv sarfi, tomchi diametri, bugʻ tezligi, forsunka bosimi, sxema turi) qarshilikning oʻzgarishi tahlil qilindi.

Natijalar: kirish qismidagi mahalliy gidravlik qarshilik 1.83 Pa (0.00183 kPa) ni tashkil etadi. Bu umumiy ikki fazali qarshilikning (0.413 kPa) atigi 0.44% ini tashkil qiladi. Vakuumga ta’siri 0.014 mmHg. Suv sarfi 100 kg/soat dan 300 kg/soat ga oshganda, kirish qarshiligi 0.66 Pa dan 1.96 Pa gacha ortadi. Tomchi diametri 0.5 mm dan 1.5 mm gacha oshganda, qarshilik 2.05 Pa dan 1.73 Pa gacha kamayadi. Bugʻ tezligi 25 m/s dan 40 m/s gacha oshganda, qarshilik 1.10 Pa dan 2.46 Pa gacha ortadi. Forsunka bosimi 0.1 MPa dan 0.4 MPa gacha oshganda, qarshilik 1.88 Pa dan 1.76 Pa gacha kamayadi. Sxema turlari orasida eng yuqori qarshilik bugʻ oqimiga teskari oqimlida forsunkada  (2.05 Pa), eng past toʻgʻri oqimlida (1.83 Pa). Garchi teskari oqimli sxema qarshilikni bir oz oshirsa-da, u issiqlik almashinuvini yaxshilaydi va kondensatsiya samaradorligini oshiradi. Tahlilar shuni koʻrsatadiki, suv tomchilari bugʻning kinetik energiyasini yutib, uning hajmini keskin kamaytiradi, bu esa qurilmaning umumiy gidravlik oʻtkazuvchanligiga ijobiy ta’sir koʻrsatadi.